Ministri serb: Me Kosovën “shkëmb mbi shpinë”, Serbia nuk ecën
“Nëse presidenti Aleksandar Vuçiç nuk e zgjidh çështjen e Kosovës, unë nuk e di se çfarë është perspektiva jonë, sepse me këtë ‘shkëmb në shpinë’, ne nuk mund të ecim përpara”, ka thënë ministri i Shëndetësisë i Serbisë, Zlatibor Lonçar.
Lonçar ka thënë se gjëja më e rëndësishme është të investojë në paqe, sepse sipas tij, pa paqe gjithçka që bëhet për të përmirësuar ekonominë dhe standardet e qytetarëve nuk do të ketë efekt.
Ndërkohë, presidenti serb, Aleksandar Vuçiç, ka paralajmëruar se nuk e përjashton mundësinë e njohjes së pavarësisë së Kosovës, por që kërkon diçka në këmbim.
“Para së gjithash ekziston mundësia për kompromis. Nuk mund ta njohim Kosovën, e të mos fitojmë diçka nga pala tjetër”, ka thënë Vuçiç, në një intervistë për agjencinë italiane ANSA.
Siç transmetojnë mediat serbe, Vuçiç ka thënë se çështja e ndryshimit të kufijve është një temë kontravrese, pasi që nuk i njohin të gjithë kufijtë e njëjtë, varësisht nga ajo nëse e kanë njohur Kosovën ose jo.
Gjithashtu Vuçiç është shprehur se dialogu mes Kosovës dhe Serbisë nuk do të vazhdojë derisa Qeveria e Kosovës nuk e tërheq taksën prej 100 për qind ndaj mallrave të Serbisë dhe Bosnjës e Hercegovinës.
