Nufi pret Drejtorin e EEAS: Shqipëria riafirmon rolin si partner i besueshëm për sigurinë evropiane

Ministri i Mbrojtjes, Ermal Nufi, priti sot Drejtorin për Paqen, Partneritetet dhe Menaxhimin e Krizave në Shërbimin Evropian të Veprimit të Jashtëm, Cosmin Dobran. Në takim u vlerësua Partneriteti për Siguri dhe Mbrojtje si një platformë praktike për bashkëpunim të strukturuar, ndërsa u riafirmua angazhimi i Shqipërisë për vijimin e dialogut dhe për arritjen e rezultateve konkrete.

Sipas TV Klan, Nufi theksoi se Shqipëria mbetet një partner i besueshëm për sigurinë evropiane dhe riafirmoi gatishmërinë për të thelluar dhe forcuar partneritetin strategjik mes Bashkimit Evropian dhe NATO-s, duke u rreshtuar plotësisht me politikën e jashtme dhe të sigurisë të BE-së.

Gjatë bisedimeve u ndal edhe roli i Forcave të Armatosura në misionet paqeruajtëse dhe në operacionet e menaxhimit të krizave të BE-së. Aktualisht Shqipëria kontribuon me një kompani këmbësorie të lehtë prej 125 personash në Grupbatalionin e BE-së (EUBG-27), nën drejtimin e Italisë, dhe ka shtuar praninë e saj në misionin EUFOR ALTHEA në Bosnje e Hercegovinë përmes dislokimit të një toge, me synimin për ta rritur më tej këtë kontribut.

Në kuadër të parandalimit të flukseve migratore në Detin Egje, edhe pse operacionet varen nga komanda e NATO-s, anijet e Rojës Bregdetare të Shqipërisë ofrojnë mbështetje për Bashkimin Evropian në trajtimin e migracionit të parregullt dhe forcimin e sigurisë detare, me mbështetjen e Ministrisë së Mbrojtjes, raporton TV Klan.