Federata e Futbollit e Kosovës, në bashkëpunim me sponsorin zyrtar të Albi Mall Superligës, Albi Mall, ka vazhduar edhe në edicionin 2026/27 me ndarjen e çmimit tradicional “Ylli i Javës”, që i dedikohet futbollistit më të dalluar të çdo xhiroje në elitën e futbollit kosovar.

Për xhiron e dytë të kampionatit, çmimi “Ylli i Javës” i është ndarë futbollistit të SC Gjilanit, Oltion Bilalli, i cili shkëlqeu në fitoren e skuadrës së tij ndaj Llapit.

Bilalli ishte protagonisti kryesor i triumfit të Gjilanit në Podujevë, duke realizuar të dy golat në fitoren 0:2 ndaj Llapit. Me dy golat e shënuar në pjesën e parë, sulmuesi gjilanas i dha skuadrës së tij pikët e plota dhe një start të rëndësishëm në kampionat.

Pas marrjes së çmimit, Bilalli e ka vlerësuar lart fitoren ndaj Llapit, duke theksuar se për Gjilanin çdo ndeshje është e rëndësishme.

“Kjo për neve ka qenë një ndeshje shumë me rëndësi. Të gjithë e dimë që është vetëm fillimi i kampionatit, por për neve çdo ndeshje është finale. Objektivat dhe synimet e klubit dihen dhe janë shumë të qarta. E rëndësishme për ne ka qenë që t’i marrim tri pikët e plota”, ka thënë Bilalli.

Ai është shprehur i lumtur për dy golat, veçanërisht për faktin se ato erdhën në një fitore të rëndësishme për ekipin.

“Është ndjenjë e veçantë të shënosh gol, sidomos kur ekipi fiton. Për ne ka qenë një ndeshje shumë e vështirë, por dy golat e shpejtë në pjesën e parë besoj se e hapën ndeshjen”, ka shtuar ai.

Bilalli, në fund, ka falënderuar familjen, bashkëlojtarët dhe shtabin teknik për mbështetjen e vazhdueshme.

“Së pari dua ta falënderoj familjen time, që është gjithmonë afër meje. Pastaj dua t’i falënderoj edhe bashkëlojtarët e mi, trajnerin Debatik Curri dhe stafin e tij, sepse pa ta nuk do të ishte e mundur kjo çmim për mua”, ka përfunduar Bilalli.

Vlerësimi për çmimin “Ylli i Javës” është bërë nga Komisioni i Veteranëve të Futbollit.