Nuk është vetëm ushqimi: Ky zakon i papritur mund t’ju bëjë të shtoni kilogramë

Gjumë më i shkurtër, më pak energji dhe një kilogram më shumë në peshore? Një studim i ri sugjeron se edhe një ndryshim i vogël në orët e gjumit mund të ketë pasoja me kalimin e kohës.

Gjumi shpesh nënvlerësohet kur flitet për shëndetin dhe kontrollin e peshës. Shumë njerëz përqendrohen tek ushqimi dhe aktiviteti fizik kur duan të humbasin kilogramë, por edhe dy faktorë të tjerë kanë një rol të rëndësishëm: stresi dhe gjumi.

Sidomos gjumi është një nga elementët më të neglizhuar të një stili të shëndetshëm jetese. Në një kohë kur lodhja dhe mungesa e pushimit shpesh shihen si pjesë normale e përditshmërisë, kërkimet tregojnë se gjumi i pamjaftueshëm mund të dëmtojë shëndetin dhe të rrisë rrezikun për shtim në peshë dhe probleme të tjera kronike.

Studiues nga Universiteti i Kolumbias analizuan nëse mungesa e rreth 90 minutave gjumë çdo natë për gjashtë javë do të ndikonte në peshën e njerëzve. Rezultatet treguan diçka që mund të jetë befasuese.

Si u zhvillua studimi?

Ndryshe nga shumë kërkime të tjera për gjumin, ky studim nuk u krye në një laborator, por në shtëpitë e pjesëmarrësve.

Në të morën pjesë 95 persona mbi moshën 20 vjeç, shumica gra. Studimi u nda në dy faza.

Në fazën e parë, pjesëmarrësit vazhduan rutinën e tyre normale të gjumit, duke fjetur rreth 7 deri në 9 orë çdo natë.

Në fazën e dytë, atyre iu kërkua të flinin rreth 90 minuta më pak se zakonisht, duke shtyrë orarin e gjumit për më vonë. Renditja e fazave ndryshonte nga një person tek tjetri dhe secila fazë zgjati gjashtë javë.

Gjatë studimit, studiuesit mblodhën të dhëna për peshën, përmasat e belit, përqindjen e yndyrës trupore, analizat e gjakut dhe urinës. Gjithashtu, pjesëmarrësit mbanin pajisje që matnin gjumin dhe aktivitetin fizik.

Çfarë zbuluan studiuesit?

Gjatë periudhës kur flinin më pak, pjesëmarrësit humbën mesatarisht rreth 80 minuta gjumë çdo natë.

Në fund të kësaj faze, studiuesit vunë re se ata kishin shtuar mesatarisht rreth gjysmë kilogrami dhe kishin kaluar më shumë kohë pa lëvizur, krahasuar me periudhën kur flinin mjaftueshëm.

Sipas studiuesve, edhe mungesa e vogël e gjumit, nëse përsëritet çdo natë për një kohë të gjatë, mund të grumbullohet dhe të ndikojë në shtimin gradual të peshës.

Megjithatë, ata theksuan se studimi kishte kufizime, pasi numri i pjesëmarrësve ishte i vogël dhe kohëzgjatja nuk ishte e mjaftueshme për të përcaktuar nëse rezultatet ndryshojnë mes burrave dhe grave apo sipas fazave të jetës së grave.

Çfarë do të thotë kjo në jetën e përditshme?

Shumica e studimeve sugjerojnë se koha ideale e gjumit për të rriturit është rreth 7 deri në 9 orë gjumë cilësor çdo natë.

Mungesa e gjumit dhe cilësia e dobët e tij janë lidhur me rrezik më të lartë për tension të lartë, sëmundje të zemrës, diabet, obezitet dhe probleme të shëndetit mendor.

Një nga arsyet pse mungesa e gjumit ndikon kaq shumë në trup është se mund të rrisë inflamacionin. Inflamacioni i vazhdueshëm lidhet me shumë prej problemeve shëndetësore që shfaqen edhe kur një person nuk fle mjaftueshëm.

Për ata që duan të humbin ose të ruajnë peshën, ekspertët sugjerojnë një qasje të balancuar: ushqime të pasura me fibra, proteina dhe yndyra të shëndetshme, më pak sheqerna të shtuara dhe ushqime shumë të përpunuara.

Po ashtu, aktiviteti fizik mbetet i rëndësishëm. Ecja, çiklizmi, vrapi, ushtrimet e forcës dhe shtrirjet mund të ndihmojnë në ruajtjen e një peshe të shëndetshme.

Gjumi dhe stresi janë gjithashtu të lidhur ngushtë. Kur një person është i stresuar, shpesh fle më keq, ndërsa mungesa e gjumit mund ta bëjë më të vështirë menaxhimin e stresit.

Për të përmirësuar gjumin, ekspertët këshillojnë krijimin e një rutine qetësuese para fjetjes: më pak dritë në mbrëmje, më pak përdorim të telefonit ose pajisjeve elektronike para gjumit, shmangie të vakteve të rënda vonë dhe mbajtjen e një orari të rregullt gjumi.

Nëse një person fle mjaftueshëm, por përsëri zgjohet i lodhur ose ndihet i përgjumur gjatë ditës, mund të jetë e nevojshme të konsultohet me një mjek, pasi mund të ketë çrregullime të gjumit, si ndërprerja e frymëmarrjes gjatë gjumit.