Opozita refuzon propozimin për armëpushim

Opozita siriane në ekzil refuzoi me forcë propozimin për një armëpushim në Siri, i kërkuar nga SHBA-ja dhe Rusia.

Riad Hijab, president i Këshillit të Lartë të Opozitës Siriane, delegacion i ngarkuar për bisedimet e paqes me qeverinë e Damaskut, të ndërmjetësuara nga OKB, konfirmoi që asgjë nuk mund të arrihej ndërkohë që Assad ishte në pushtet.

”Asnjë marrëveshje nuk është e mundur përderisa presidenti Assad është ende në pushtet”, deklaroi ai.

Fuqitë e Mëdha dështuan në një armëpushim të plotë në Siri duke rënë dakord vetëm për një ndalim të raprezaljeve, deklaroi sot në mëngjes sekretari amerikan i Shtetit, John Kerry.

”Armëpushimi i pjesshëm nuk do të aplikohet për ISIS-in dhe milicinë e Frontit al-Nusra”, theksoi ai.

”Një takim i Grupit Ndërkombëtar Mbështetës për Sirinë në Mynih rezultoi në një marrëveshje tjetër për zgjerimin dhe përshpejtimin e ndihmave humanitare në qytetet e rrethuara siriane duke filluar nga mëngjesi i ditës së hënë”, deklaroi Kerry.

Kerry, homologu i tij rus, Sergei Lavrov dhe i dërguari i OKB-së, Staffan de Mistura zhvilluan gjashtë orë bisedime me ministrin e Jashtëm gjerman, Frank-Walter Steinmeier dhe ministra të tjerë të Jashtëm të Evropës dhe Lindjes së Mesme për arritjen e kësaj marrëveshjeje. Ajo parashikon krijimin e dy task forcave për të mbikëqyrur në mënyrë të pavarur shpërndarjen e ndihmave humanitare dhe ndalimin e raprezaljeve.