Orlando vishet me ngjyrat e ylberit, homazhe në të gjithë vendin

Qyteti i tragjedisë, Orlando, është veshur me ngjyrat e ylberit në nder të viktimave që humben jetën në lokalin për homoseksualë në qytet. Homazhe janë mbajtur edhe në qytete të tjera të Shteteve të Bashkuara, teksa institucionet kanë ulur flamujt në gjysëm shtizë.

Ngjyrat e ylberit kanë veshur qiellin e Orlandos, teksa qyteti zhvillon homazhe në nder të viktimave që u vranë brutalisht në lokalin e natës që frekuentohej nga homoseksualë.

Në fakt në të gjitha Shtetet e Bashkuara të Amerikës njerëzit kanë ndezur qirinj dhe kanë vendosur lule në memoriale të improvizuara për të shprehur dhimbjen ndaj të gjitha viktimave. Në Indiana, Teksas, Washington, News York, etj mesazhet në pankarta ishin “Ne jemi më të fortë se frika” dhe “Dashuria është më e fortë se urrejtja”.

Jashtë Shtëpisë së Bardhë gjithashtu qindra njerëz kanë vendosur lule dhe kanë ndezur qirinj, teksa flamujt e të gjitha insitucioneve janë ulur në gjysëmshtizë.

Ka pasur edhe të revoltuar, veçanërisht nga komuniteti gay, të cilët kanë protestuar kundër lirisë së përdorimit të armëve, një debat që vijon prej vitesh në Shtetet e Bashkuara të Amerikës.