Papa gjatë kthimit në Romë: Shqipëria vend evropian. Komunizmi, periudhë mizore

Udhëtimi i kthimit nga Shqipëria në Romë, zgjati 90 minuta, por gjithsesi Papa Françesku gjeti rastin të tregojë në avion përshtypjet e tij pas vizitës zyrtare 11-orëshe në vendin tonë.

Gjatë bisedës së tij me gazetarët, Papa theksoi se Shqipëria është në periferi të Evropës dhe pavarësisht se aty jeton një shumicë myslimane, “ai nuk është një vend mysliman, por evropian, pasi bashkëpunimi mes tre feve është thelbësor. Aty ka një bashkëjetesë, kulturë dhe tolerancë fetare”.

Megjithatë, Ati i Shenjtë është befasuar nga rinia e Shqipërisë: “Më thanë se është popullata më e re e aftë për të ndërtuar vëllazërinë”.

Vitet e persekutimit komunist, Papa i kujton me dhimbje: “Kisha dy muaj që studioja për periudhën e vështirë që ka kaluar Shqipëria, ka qenë një periudhë mizore dhe e tmerrshme. Kur pashë ato fotografitë e martirëve, jo vetëm të katolikëve, por edhe të ortodoksëve dhe myslimanëve, u preka… I vrisnin sepse pranonin që besonin në Zot. Të tre komunitetet fetare kanë qenë dëshmitarë të vëllazërisë”, – përfundoi kreu i Vatikanit.