PD e gatshme për transparencë dhe hetim në lidhje me akuzat për kredinë

Partia Demokratike ka dënuar sot sulmet politike ndaj opozitës ndërmarrë së fundmi nga maxhoranca në lidhje me kredinë e marrë në 2009. Nepermjet nje deklarate, zëdhënësja Oriela Nebiaj, tha se “kredia e marrë në 2009 u vlerësua nga FMN si arritje e qeverisë dhe shpëtoi financat nga kolapsi”.

Partia Demokratike është e hapur për hetim dhe transparencë, tha ajo, duke shtuar se “në kohën kur ekonomia është në rënie dhe gjithë treguesit e saj janë përkeqësuar, qeveria nuk merr asnjë masë, por zgjedh të sulmojë opozitën. Në vend se të rishohë politikën me taksat, të mos i rrisë, por t’i reduktojë ato, në vend qe të heqë dorë nga asfiksia që po i bën biznesit, qeveria zgjedh të sulmojë opozitën”.

Zedhenesja sqaroi se “kredia e marrë në vitin 2009 është vlerësuar në atë kohë nga FMN si arritje e qeverisë shqiptare. Kredia parandaloi rënien e financave të vendit në kolaps dhe me përmirësimin e kushteve në tregjet financiare botërore, kjo kredi u zëvendësua me një kredi shumë më të lirë pa u mbushur viti”. “Partia Demokratike është e hapur për çdo hetim dhe fton organet kompetente të bëjnë transparencë deri në fund”, u shpreh Nebiaj.