Rama dhe Vuçiç, brenda 15 ditësh nënshkruajnë protokollin për autostradën Durrës–Nish

Shqipëria dhe Serbia do të nënshkruajnë brenda 15 ditësh protokollin për realizimin e projektit të autostradës Durrës-Nish.

Lajmi bëhet i ditur nga Ministrja serbe e Infrastruktrës Zorana Mihajloviç e cila deklaron se protokolli do të nënshkruhet nga Kryeministri i Shqipërisë, Edi Rama dhe Kryeministri i Serbisë, Aleksandër Vuçiç.

Sikurse raporton Gazeta Express, Ministrja serbe është shprehur se projekti i autostradës Nish-Merdare –Prishtinë-Tiranë –Durrës do të kushtojë rreth 1 miliardë euro,

“Serbia dhe Shqipëria që prej 6 muajsh janë duke punuar rreth kësaj dhe jemi duke i përgatitur projektet të cilat dy Kryeministrat do t’i prezantojnë në Vjenë gjatë muajit gusht”, ka thënë Mihajlovic.

Ajo ka theksuar se kjo autostradë do të jetë e rëndësishme sepse e lidhë rajonin, veçmas për Serbinë e cila do të sigurojë dalje në det nëpërmjet Shqipërisë.

Ministrja ka theksuar se stabiliteti politik është kusht për realizimin e këtij projekti.