Rusia ka dyshime se Turqia po përgatit ndërhyrje ushtarake në Siri

Rusia ka bërë të ditur se kohët e fundit po vihen re ndryshime në instalimet e infrastrukturës rrugore në kufirin midis Turqisë e Sirisë dhe se gjithnjë e më shumë shenja tregojnë se ka arsye për të dyshuar që Turqia po përgatitet për ndërhyrje ushtarake në Siri.

Në një konferencë shtypi të enjten, zëdhënësi i Ministrisë së Mbrojtjes të Rusisë Igor Konashenkov paraqiti informacionet që zotërohen nga pala ruse. Sipas Konashenkovit, nëpërmjet pikave të kontrollit në kufirin me Sirinë, Turqia u ofron natën armë terroristëve në provincat Aleppo dhe Idlib të Sirisë Veriperëndimore. “Për habinë tonë, me gjithë thirrjet e palës ruse për të reaguar ndaj këtyre veprimeve, Pentagoni, NATO dhe shumë të ashtuquajtura organizata për mbrojtjen e të drejtave të njeriut në Siri, qëndrojnë në heshtje” tha zëdhënësi i Ministrisë së Mbrojtjes të Rusisë.