Shoqata e Bankave organizon forumin e parë të biznesit – SWIFT Albania 2014

Shoqata Shqiptare e Bankave organizoi të mërkurën forumin e parë të biznesit për SWIFT, ku pjesëmarrësit diskutuan rreth mundësive të zhvillimit të mëtejshëm të zgjidhjeve që ofron kjo platformë për biznesin bankar dhe institucionet, si dhe zhvillimin e infrastrukturës së sistemit të pagesave në Shqipëri

SWIFT është shkurtimi për Shoqërinë Botërore Ndërbankare të Telekomunikacionit Financiar, që numëron 10,500 institucione anëtare në të gjithë botën dhe që ofron infrastrukturën për këmbimin e mesazheve financiare të standardizuara. Për një transfertë bankare një nga elementet e domosdoshme për t’u plotësuar është kodi SWIFT-i i bankës pritëse.
SWIFT-i lindi në vitin 1973 në Bruksel, me misionin bazë të krijimit të një gjuhe të përbashkët për transaksionet financiare ndërkombëtare. Në Shqipëri, SWIFT hyri 20 vjet më parë dhe sot përdoret nga bankat tregtare dhe nga institucione të rëndësishme publike, si Banka e Shqipërisë dhe Ministria e Financave.