Shqipëria e fundit në rajon për transportin ajror, lider aeroporti i Podgoricës

Aeroporti Ndërkombëtar “Nënë Tereza” ndërkohë lë pas atë të Prishtinës, me një rritje prej 12.7%, atë të Sarajevës me 10.2% dhe atë të Beogradit me 6.5%.

Për qershorin kur ka një fluks më të lartë turistësh pritet që të dhënat të flasin për rritje mbi 15%, por nuk dihet nëse kjo do të mjaftojë për të mposhtur në “luftën ajrore” të Ballkanit treguesit e Shkupit. Ecuria gjatë pesë muajve të parë të vitit tregon se rritja e transportit ajror në Maqedoni po zbret, ndërsa ajo e Shqipërisë është në rritje konstante, sidomos prej ndikimit të sezonit veror.

Ndërkohë edhe për pjesën tjetër të verës pritet që lideri absolut në rajon të jetë aeroporti i Podgoricës, i cili është tashmë për pesë muajt e parë në rritje me 19.7%, krahasuar me 11.4% të aeroportit të Tiranës. Për këtë vit, Mali i Zi renditet i katërti ndër shtetet me rritjen më të shpejtë të sektorit ajror ndërsa Shqipëria ndjek në vendin e 16-të.

Përfitime nga nisja e sezonit veror ka pasur edhe Greqia, e cila ka pritur 19% më shumë udhëtarë përmes rrugëve ajrore. Sa i takon grupit të aeroporteve që presin mbi 25 milionë pasagjerë në vit, kryeson ai i Antalias, i cili gjatë Majit priti 32.7% më shumë udhëtarë, në një kohë kur rritja mesatarja e aeroporteve të Europës është prej 6.7%.