Trojka: Reformat, vakuumi financiar dhe pasmemorandumi në qendër të bisedimeve

Zbatimi brenda afateve i paketës së reformave, vakuumi financiar për 2015-n dhe periudha pas memorandumit e ekonomisë greke janë tre çështjet themelore që preokupojnë trojkën (BE – FMN – BQE) e kreditorëve të ekonomisë së vendit ballkanik.

BE-ja thekson se testimi i radhës i programit grek do të kryhet në të paktën dy faza.

Në fazën e parë, që do të fillojë të martën, 30 shtator dhe do të vazhdojë deri më 8 tetor, do të shqyrtohet në detaje zbatimi i buxhetit të vitit 2014, me theks në ecurinë e shpenzimeve, si dhe projektbuxhetin e 2015-s.

Përsa i përket vitit të ardhshëm, Brukseli konfirmon vlerësimin për një vakuum financiar dy miliardë euro. Për këtë arsye duhet të shqyrtohet hollësisht impakti fiskal i lehtësimeve tatimore që ka shpallur qeveria greke.

Gjithsesi, BE-ja thekson se ”nuk do të ketë devijim nga objektivat fiskale të vitit 2015”. Ndërkohë, përsa i përket taksës së posaçme të solidaritetit, Brukseli thekson se do të shqyrtohet zgjatja e kësaj takse edhe për një vit.

Ndërsa për taksën e konsumit të energjisë ajo që kërkohet nga Brukseli është lufta kundër evazionit fiskal dhe mashtrimeve. Brukseli këmbëngul se është shumë i rëndësishëm zbatimi i paketës së reformave që parashikon programi grek, si për shembull në fushën e drejtësisë dhe të administratës publike.

Sa i përket kësaj të fundit, theks i veçantë do të jepet për pagat dhe kompesimet, ku Brukseli konsideron se ka mospërputhje të mëdha ndërmjet pagave më të ulëta dhe më të larta.