Ulqin: Prindërit ia shpjeguan presidentit Milatoviq pse fëmijët e tyre ende nuk shkojnë në shkollë

Presidenti i Malit të Zi, Jakov Milatoviq, gjatë vizitës së punës në Ulqin u prit nga një grup prindërish të nxënësve të klasës së parë, të cilët ende nuk ndjekin mësimin — edhe pse viti shkollor ka nisur prej kohësh.

Fjala është për 13 nxënës të shkollës fillore “Maršal Tito” në Ulqin, të regjistruar në degën në gjuhën malazeze. Prindërit e tyre nuk pajtohen me drejtimin e shkollës se kush duhet t’u mësojë shkronjat e para fëmijëve. Ata kërkojnë një mësues që plotëson të gjitha kushtet ligjore dhe zotëron gjuhën standarde CSBH në nivelin e nevojshëm për punë me klasën e parë.

Mësuesja e caktuar për klasën, sipas prindërve, ka përfunduar shkollimin në gjuhën e saj amtare shqipe dhe posedon vetëm një certifikatë njohjeje të gjuhës malazeze. Një nga prindërit, Anela Spičanović, ia shpjegoi drejtpërdrejt problemin presidentit Milatoviq. Prindërit i janë drejtuar Ministrisë së Arsimit dhe inspekcionit arsimor, i cili ka marrë dokumentacionin — por ata ende nuk kanë asnjë informacion zyrtar se kur dhe në çfarë kushtesh do të nisin mësimin fëmijët.

Milatoviq tha se nuk është kompetent për çështjen e njohjes së gjuhës, por premtoi se do t’i drejtohet Ministrisë që sot për të kërkuar përgjigje. Prindërit theksuan se kërkesat e tyre nuk janë politike, kombëtare apo fetare: “Nuk na intereson nëse mësuesja është ortodokse, myslimane apo katolike, shqiptare apo malazeze… E vetmja matëse është të jetë e shkolluar për atë që duhet t’u mësojë fëmijëve tanë.”

Ndërkohë, drejtoresha e shkollës Ferida Hajdinaga tha se të hënën është shpallur konkurs për vendin e mësuesit/es së arsimit fillor në gjuhën malazeze dhe se gjithçka është bërë në përputhje me ligjin. Për shkak të mungesës së kuadrit, klasës së parë i është caktuar për një muaj një mësuese me njohuri të gjuhës malazeze — gjë që, sipas saj, është në përputhje me ligjin, sepse arsimi fillor është i detyrueshëm.

Milatoviq ishte në vizitë pune në Ulqin, ku vizitoi shkollat “Boško Strugar” dhe “Maršal Tito”, si dhe shkollën e mesme “Bratstvo-jedinstvo”.

Burimi: Vijesti