Vdes Johan Cruyff legjenda e futbollit botëror

Johan Cruyff, një nga futbollistët më të mirë të historisë, vdiq sot në moshën 68-vjeçare, si pasojë e një kanceri në mushkëri, njoftuan të afërmit e tij në Twitter.

“Më 24 mars 2016, Johan Cruyff (68 vjeç) vdiq në Barcelonë, i rrethuar nga familja, pas një beteje kundër kancerit. Ne kërkojmë respektimin e intimitetit të familjes së tij gjatë zisë”, thanë të afrëm të tij në Twitter.

Në mes të shkurtit, legjenda holandeze e futbollit, Johan Cruyff kishte deklaruar se e kishte fituar 2-0 pjesën e parë të ndeshjes kundër kancerit dhe besonte fort se do ta fitonte të gjithë ndeshjen kundër sëmundjes që i kishte prekur mushkëritë.

Ish-ylli i Ajaksit, Barcelonës dhe Holandës, Cruyff, i cili në vitin 1991 bëri një operacion në zemër, renditet ndër futbollistët më të mirë të të gjitha kohërave.

Ai është fitues i tre Topave të Artë (1971, 1973, 1974).