Veseli: Nuk ndërhyjmë në çështjet e brendshme të Maqedonisë

Kryetari i Kuvendit të Kosovës, Kadri Veseli, ka deklaruar lidhur me ngjarjet e fundit në Maqedoni se nuk do që Kosova të përzihet në çështjet e brendshme të këtij shteti.

Ai është shprehur se Kosova duhet të ruajë miqësinë me fqinjët e saj.

“Realisht, Republika e Maqedonisë është një vend fqinj me të cilin dëshirojmë të kemi marrëdhënie fqinjësore të mira , të mos kemi keqkuptime, të mos përzihemi në punët e brendshme të tyre. Ne dëshirojmë që shqiptarët të cilët përbëjnë një pjesë të popullatës së Maqedonisë të jenë të integruar në atë shtet…”, ka thënë ai.

Këto deklarata, Veseli i ka dhënë gjatë një ceremonie për Ditën e Tokës.

Siç raporton ‘Zëri’, ai ka folur edhe për krijimin e Gjykatës Speciale, për të cilën ka thënë se nuk ka ndonjë datë të saktë kur do të themelohet, por që Kosova duhet të ketë një konsensus politik dhe ta ruajë partneritetin me Bashkësinë ndërkombëtare.

“Kurdo që do të vjen me rëndësi është të kemi konsensus në aspektin politik dhe ta ruajmë vazhdimësinë e partneritetit me bashkësinë ndërkombëtare. Gjithsesi, do të ketë një ambient të shëndoshë sepse ne jemi 120 deputetë të zgjedhur dhe kemi përgjegjësi para atyre që na kanë zgjedhur. Unë dëshiroj të përcjellë mesazhin e konsensusit nacional, mirëkuptimit dhe bashkëpunimit, veçanërisht në këto sfida të mëdha”, ka thënë Veseli.