Bregu i përgjigjet Gjoshës: Këshilli i Integrimit, një shpikje që do të dështojë
Majlinda Bregu komentoi për mediat ftesën që ka marrë nga ministrja e Integrimit Klajda Gjosha për bashkëdrejtimin e Këshillit Kombëtar të Integrimit së bashku me Arta Daden.
Sipas deputetes së Partisë Demokratike, ky Këshill është një shpikje që do të dështojë.
“Ministres së Integrimit i kam kërkuar që të mos zbatojë asnjë standart tjetër përveç standartit europian dhe të mos bëjë asnjë shpikje që ka në themel dështimin e plotë. I takon Parlamentit të ngrejë një strukturë që do të jetë bazë për monitorimin e qeverisë dhe përgjegjës për fazat e ardhshme të integrimit. Këshilli ka për kryetar përfaqësuesin e opozitës dhe nënkryetar një përfaqësues nga mazhoranca”, shpjegoi zonja Bregu.
Sipas Bregut, ky është një model që nuk është parë asgjëkundi pasi kontrolli i Këshillit i lihet opozitës për t’u siguruar monitorimi i qeverisjes: “Ky është modeli që kanë ndjekur vendet e tjera, por nuk kam shpresë që do të ketë ndonjë tërheqje”.
