Merkel sot në SHBA, takohet për herë të parë me Donald Trump
Kancelarja gjermane, Angela Merkel, tha se e pret me “kureshtje” dhe “kënaqësi” takimin e sotëm me presidentin e Shteteve të Bashkuara, Donald Trump, në Uashington.
“Gjithnjë është më mirë të bisedohet me njëri-tjetrin se sa për njëri-tjetrin”, tha Merkel për gazetën Saarbruecker Zeitung.
E pyetur nëse të dy palët janë kureshtare, kancelarja Merkel tha se “natyrisht që ka kureshtje, po ashtu edhe kënaqësi për takimin me njëri-tjetrin… së paku nga ana ime”.
Takimi, i cili ishte parashikuar për datën 14 mars, u shty për shkak të motit të keq në Uashington. Ky do të jetë takimi i parë i dy liderëve.
Kancelarja Merkel tha se do të bisedojë me presidentin Trump për çështje të sigurisë, ekonomisë, dhe për të ardhmen e bashkëpunimit ndërkombëtar.
Lidhur me shqetësimet për luftë tregtare ndërmjet Shteteve të Bashkuara dhe Gjermanisë, Angela Merkel theksoi se “vendet tona përfitojnë kur punojnë mirë së bashku dhe në mënyrë korrekte”.
