Shqipëria uron Kosovën në tetë vjetorin e Pavarësisë
17 Shkurti, përvjetori i tetë i Pavarësisë së Kosovës është uruar sot dhe nga zyrtarë të lartë të politikës shqiptare në Tiranë.
Presidenti i Republikës, Bujar Nishani, kryeministri Edi Rama, kryetari i Partisë Demokratike, Lulzim Basha, ish-kryeministri Pandeli Majko, etj, përcollën mesazhe urimi për popullin e Kosovës, në vitin e tetë të Pavarësisë të saj.
Presidenti Nishani i përcolli urimet e tij permes një mesazhi drejtuar Presidentes Jahjaga, ku mes të tjerash, ai
‘përshëndet përpjekjet e jashtëzakonshme dhe arritjet e deritanishme në ndërtimin dhe konsolidimin e institucioneve, duke sjellë më shumë stabilitet e begati për Kosovën, si dhe duke e shndërruar atë në faktor të rëndësishëm bashkëpunimi e kontribuesi për paqen në rajonin e Evropës Juglindore”.
Shqipëria, thotë Presidenti, do të jetë gjithmonë pranë Kosovës në të gjitha hapat e saj shtetndërtuese, e bindur se maturia politike dhe përgjegjshmëria shtetërore e demonstruar gjatë këtyre tetë viteve pavarësi, do të vijojnë të shoqërojnë përpjekjet e mëtejshme për konsolidimin e institucioneve dhe kurorëzimin në një kohë të afërt të liberalizimit të regjimit të vizave, si dhe për avancimin e procesit të integrimit të Kosovës me BE-në.
Me një postim të shkurtër në Facebook kryeministri Rama uroi për Kosovën ne diten e Pavarësisë. “Mirënjohje përjetë heronjve dhe luftëtarëve të pavarësisë së Kosovës! Gëzuar!” shkruan kryeministri, ndërsa e shoqëron postimin e tij me një foto të Adem Jasharit, Komandanti i Ushtrisë Çlirimtare të Kosovës.
Ndërsa kryetari i PD-së, Basha në postimin e tij shkruan: “Gëzuar Pavarësine e Kosovës!”.
Edhe Ministri i Bujqësisë, Edmond Panariti, i drejtoi urimet popullit kosovar dhe qeverisë së Kosovës me rastin e 8-vjetorit të Pavarësisë. “Gëzuar përvjetorin e pavarësisë Kosovë! Mbetet proverbiale thënia e Presidentit Klinton: “Ne e fituam luftën, ju duhet ta fitoni paqen”, shkruan Panariti në postimin në Facebook.
Pandeli Majko, ish-kryeministër i Shqipërisë në kohën e luftës së Kosovës, gjithashtu uroi popullin kosovar, autoritetet e larta të vendit dhe personalitete e shquara të tij për 8-vjetorin e Pavarësisë. “Festoni, protestoni, kujtoni dhe ëndërroni për më shumë”, shkruan Majko në një mesazh në Facebook.
