Prodi: Shqipëria duhet të jetë në BE, por procesi të ndodhë pa tensione
“Shqipëria duhet të shuajë konfliktet e brendshme politike, në mënyrë që të përshpejtohet rruga drejt Bashkimit Evropian. Nëse je pjesë e Bashkimit Evropian, përshpejtohet edhe zhvillimi ekonomik”, – ka deklaruar ish-Kryeministri i Italisë, Romano Prodi në konferencën “Shqipëri-Itali, partneritet me Evropën”.
Sipas tij është e nevojshme që të ketë unitet politik të brendshëm, sidomos për sa i përket luftës kundër korrupsionit e krimit te organizuar. E gjitha është një proces kompleks.
“Në këto rajone problemi etnik është i dukshëm sepse kufijtë nuk tregojnë popullsinë e një vendi. Por unioni evropian për këtë është, për zhdukjen e kufijve. Dhe Italia me Austrinë ka pasur këtë problem, por u zhdukën me anëtarësimin e Austrisë. Dhe në njëfarë mënyre Evropa është bashkim minorancash dhe ato duhen të konservohen”, – u shpreh ish-presidenti i Komisionit Evropian, njëherësh edhe ish-kryeministër , në ditën e dytë të vizitës së tij zyrtare, në Shqipëri.
Ndonëse procesi i zgjerimit të BE-së, është ngadalësuar vitet e fundit, për Prodin nuk ka asnjë dyshim se e ardhmja e Ballkanit është brenda Evropës së Bashkuar, në ndryshim nga vendet që janë në konflikte të nxehta aktuale. Sa i përket incidentit në ndeshjen Shqipëri-Serbi, Prodi theksoi se klasa politike duhet të ketë ndryshim perspektivash.
“Do ketë provokime edhe në të ardhmen por ato duhet të mbahen nën kontroll. Procesi drejt BE-se duhet të ndodhë pa tensione”- u shpreh ish kryeministri italian.
