Home / Politika / Rama: Grabitja e votave , e keqja me e madhe

Rama: Grabitja e votave , e keqja me e madhe

Kryetari i PS, Edi Rama ka akuzuar ashpër kryeministrin Sali Berisha, se dje në Parlament ka mëpërkëmbur interesat e qytetarëve shqiptarë.

Në një konferencë për shtyp nga selia e partisë së tij, Rama është shprehur se Berisha synon vetëm pasurimin e tij personal dhe shkatërrimin “barbar” të sektorëve jetikë vendit. 

“Berisha tregoi se nuk ka planifikuar asgjë në buxhet për banorët e përmbytur. Në prag Krishtlindjesh ai tregoi se nuk ka ndërmend t’i ndalë përmbytjet, duke mos investuar në diga dhe infrastrukturë. Kur Saliu përtypte dje brockullat e tij, unë ndjeva brengosjen e pedagogëve për shkak të shkatërrimit barbar të sektorit arsimor. Pasi edhe në prag Krishtlindjesh, Berisha i lë njerëzit më të varfër se një vit më parë”, ka deklaruar Rama. 

Sipas tij, kryeministri ka lënë në harresë edhe sektorin e shëndetësisë, i cili përballet cdo ditë me probleme të rënda për shkak të kushteve të mjerueshme. 

“Saliu foli edhe për mjekët dhe infermierët, duke sharë njerëz kurajozë që mundësuan lindjen e fëmijës në mes të përmbytjeve në Lezhë. Ndërkohë që skenat mesjetare të heroizmit të mjekëve dhe infermierëve janë të përditshme në realitetet e Shqipërisë”, ka pohuar Rama. 

Ai ka prekur edhe cështjen e veteranëve dhe të të përndjekurve, duke theksuar se një komunist si Berisha nuk mund t’i zgjidhë problemet e tyre. 

“Saliu nuk tha asgjë të mirë dje për veteranët dhe të përndjekurit. Ata e neverisin figurën e tij, që kur ai u hodh nga vrka e komunizmit. Në prag të Krishtlindjeve 2010, 20 vjet pas rrëzimit të regjimit diktatorial të Enver Hoxhës dhe Berishës, Shqipëria meritonte të ishte më mirë se sa kjo që ka bërë mjeku i bllokut”, është shprehur Rama. 

“Në cilin vend të Evropës do të mund të përfytyrohej një Parlament si ai i mbrëmshmi, ku kryeministri merr oborin e tij duke u zgërdhirë pa asnjë ndjenjë turpi, pa thënë asgjë të mirë e të dobishme për vendin e vet dhe njerëzit, që po i mbyt me ujërat e zeza”, ka theksuar ai. 

Lideri i opozitës ka shtuar më tej se e gjithë kjo situatë e rëndë ka ardhur si pasojë e vjedhjes së votave nga partia në pushtet, që pasoi me refuzimin e statusit të vendit kandidat nga Evropa. 

“Dje do të diskutohej refuzimi i statusit të kandidatit. Por cdo njeri me një fije arsyeje e pa dhe e dëgjoi arsyen e madhe të mbetjes sonë pas dyerve të Evropës, duke dëgjuar Saliun, që pasi la Shqipërinë jashtë, kërkon të hedhë baltë ndaj opozitës. Dje u provua jo vetëm që ai i ka vjedhur zgjedhjet dhe se kërkon të vjedhë të ardhshmet, por u kuptua se vjedhja e zgjedhjeve është rrënja e të gjitha të këqijave”, ka shtuar Rama. 

Leave a Reply

%d bloggers like this: