Ekskluzive: Hahn letër liderëve, viziton Shkupin në janar
Komisari për zgjerim dhe fqinjësi të mirë, Johannes Hahn, u është drejtuar me letër 4 liderëve të partive parlamentare në vend, Nikolla Gruevskit, Zoran Zaevit, Ali Ahmetit dhe Menduh Thaçit, ku ka shprehur shqetësimin e tij për ngecjen e implementimit të Marrëveshjes së Përzhinos, mëson ekskluzivisht Televizioni SHENJA nga burime diplomatike.
Burimet nga ambasada e BE-së konfirmojnë se për shkak të këtyre ngecjeve, Hahn ka paralajmëruar vizitë në Shkup në gjysmën e parë të janarit. Marrëveshja e Përzhinos u implementua me vonesa dhe bllokime të shumta, duke shkelur thuajse të gjitha afatet.
Aktualisht, partitë kanë ngecur rreth bisedimeve për mediat, ndërsa pritet edhe dorëheqja e kryeministrit Gruevski. Gjithashtu, Prokurorja Speciale Katica Janeva po përballet me obstruksione të shumta. Përveç që dje Kuvendi nuk votoi ligjin për administratorët e saj, në Gjykatën Kushtetuese ka edhe iniciativa për shqyrtimin e kushtetutshmërisë të Prokurorisë Speciale.
