Rexhepi: Kosova, situatë të qëndrueshme dhe të menaxhueshme të sigurisë

Ministri i Punëve të Brendshme i Kosovës, Bajram Rexhepi priti, sot në takim lamtumire Admiralin Bruce Clingan, Komandant i Forcave të Përbashkëta të NATO-së me seli në Napoli, si dhe pasardhësin e tij në këtë pozitë, Admiralin Mark E. Ferguson.

Ministri Rexhepi, sipas zyrës së tij, falënderoi Admiralin Clingan për bashkëpunimin e shkëlqyer, si dhe për rolin dhe mbështetjen e NATO-s ofruar për Republikën e Kosovës dhe qytetarët e saj. Ai vlerësoi se falë këtij bashkëpunimi sot kemi një situatë të qëndrueshme dhe të menaxhueshme të sigurisë.
Ndërsa, Admirali Clingan, theksoi se është impresionuar me zhvillimet pozitive në sferën e sigurisë dhe me arritjet e Policisë së Kosovës në menaxhimin e situatave të ndryshme të sigurisë, si dhe për reformat e ndërmarra në sektorin e sigurisë.
Në këtë takim, Admirali Clingan prezantoi pasardhësin e tij në këtë pozitë, Admiralin Mark E. Ferguson dhe theksoi rëndësinë e vazhdimit të bashkëpunimit me Admiralin Mark E. Ferguson në kuadër të bashkëpunimit të shkëlqyer që ekziston mes Kosovës dhe NATO-s.