Kukan: Kujdes me zgjedhjet, janë test për dekriminalizimin

Zgjedhjet e ardhshme do të jenë test për Shqipërinë dhe zbatimin e ligjit të dekriminalizimit.

Kështu tha eurodeputeti Eduard Kukan pas votimit në Parlamentin Europian të projekt-rezolutës për vendin tonë.

“Unë dua të bëj një apel për politikanët shqiptarë, të bëjnë përpjekje për të adresuar rekomandimet e OSBE/ODIHR-it para zgjedhjeve të ardhshme. Zgjedhjet janë test i rëndësishëm për sistemin demokratik dhe kulturën e pjekur politike që funksionon.

Shpresoj se zgjedhjet do të jenë një rast për partitë politike për të zbatuar “dekriminalizimin”.

Konsensusi politik që çon në miratimin e reformës në drejtësi është një hap i rëndësishëm në këtë proces. Unë besoj se zbatimi i tij do të forcojë në mënyrë të konsiderueshme besimin e qytetarëve në gjyqësor dhe sundimin e ligjit.

Ne mbështesim këtë proces dhe misionin e vëzhgimit ndërkombëtar, i cili është duke e mbikëqyrë zbatimin”, tha Kukan.