Deputetët po e cilësojnë tejet të dobët raportin e Qeverisë për shërbimin civil

Tejet të dobët e të thatë e kanë cilësuar anëtarë të komisionit për administratë publike, raportin e Qeverisë së Kosovës për gjendjen në shërbimin civil për vitin 2014.

Shqipe Pantina nga Lëvizja Vetëvendosje tha se përveç që raporti është i dobët, nga 20 faqe sa ka, gjysma janë me tabela dhe që nuk shpjegojnë asgjë.

Ajo ka kërkuar që për këtë raport të jetë dikush nga Qeveria të debatojnë e jo të diskutohet vetëm nga anëtarë të komisionit.

Njëjtë tha edhe Zafir Berisha i Nismës. Ai ka kërkuar që në komision të jenë anëtarë të Qeverisë, raporton Arta TV.

Ndërsa, Xhevahire Izmaku e PDK-së tha se do të ishte mirë që për shpjegime para komisionit të vijë dikush direkt nga zyra e kryeministrit.

Komisioni vendosi që ta shtyjë shqyrtimin e këtij raporti për të mërkurën e javës që vjen.