Zbulohen detaje nga mbledhja urgjente e qeverisë në Durrës

Orë të rëndësishme brenda mazhorancës që po qeveris vendin.

Pas deklaratës së kreut të Kuvendit, Ilir Meta se vendi duhet të shkojë në zgjedhje të parakohshme pas miratimit të reformës me një qeveri teknike kryeministri Edi Rama ka thirrur në një mbledhje urgjente ministrat socialistë. Mësohet se takimi po mbahet në vilën qeveritare të Durrësit.

Të pranishëm janë edhe disa zyrtarë të lartë të Partisë Socialiste.

Sipas portalit lapsi.al,  kryeministri Rama është shprehur kundër krijimit të një qeverie teknike që do ta çonte vendin në zgjedhje të parakohshme.

Sipas tij, meqenëse reforma në drejtësi është një çështje themelore dy janë rrugët që do të ndiqen. Pozicionimi i aleatit të tij në qeveri ndryshe nga mazhoranca do të çojë në një ndarje të PS me LSI. Rama do të provojë fillimisht të bëjë një qeveri me socialistët dhe me disa parti të vogla siç është PDIU ose edhe ndonjë deputet që mund të “peshkohet” gjatë rrugës. Nëse edhe ky variant dështon dhe ai nuk i bën numrat në parlament, vendi do të shkojë në zgjedhje të parakohshme.