Rama: Po bëjmë reformat që kanë munguar për 25 vjet

Zgjedhjet në Partinë Socialiste janë duke u zhvilluar këtë të shtunë në kryeqytet, për të zgjedhur strukturat e Partisë.

Kreu i saj, Edi Rama ka hedhur votën e tij në njësinë administrative të Dajtit, ku ka bërë ftesë për më shumë anëtarësime në PS.

“Bashkojuni PS-së si e vetmja forcë transformuese. Partia Socialiste është e vetmja parti që bën reforma. Po bëjmë reformat që i kanë munguar këtij shteti për 25 vjet”, është shprehur Rama.

Ndërkohë, deri në mesditë 40 përqind e anëtarëve të Partisë Socialiste të Tiranës kanë votuar sipas parimit “një anëtar, një votë” për zgjedhjen e delegatëve të Kongresit të 19 marsit.

Kreu i socialistëve të kryeqytetit, Saimir Tahiri shprehu për publikun bindjen e tij se deri në përfundim të procesit të votimit, shumica dërrmuese e anëtarësisë së partisë do të kenë marrë pjesë në votim.

Tahiri e vlerësoi procesin me rëndësi të madhe jo vetëm për zgjedhjet brenda partisë, por edhe si rritje e kapacitetit për të komunikuar me qytetarët për hir të reformave të ndërmara nga qeveria.

Në të gjithë vendin zhvillohen 5 mijë procese zgjedhore në PS, duke i paraprirë kështu kongresit të marsit.