Xhihadisti John, email gazetës “Mail on Sunday”: Jam një i vdekur që eci
Xhihadisti britanik John, xhelati më i pamëshirshëm i ISIS-it, e ka ditur se shërbimet sekrete të Britanisë së Madhe i ishin afruar shumë dhe se ai ishte “një i vdekur që ecte”.
Disa e-maile me përmbajtje të çuditshme ai ua ka dërguar gazetarëve të “The Mail on Sunday” para se ai të largohej nga Britania për t’iu bashkuar me ISIS.
Mohammed Emwazi, emri i tij i vërtetë, i njohur tashmë si xhihadisti që pret kokat e pengjeve me thikë para kamerave, pretendonte se ishte një viktimë e pafajshme e persekutimit të MI5.
Emwazi, shfaqur në 6 ekzekutime të pengjeve në Siri, shkruan në e-mail se përndjekja e kishte prekur aq keq sa kishte menduar vetëvrasjen.
“Do të marr sa më shumë pilula që të mundem, pasi kështu unë do të fle përgjithmonë”, kishte paralajmëruar ai.
E-mailet e tij i ishin dërguar redaktorit për çështjet e sigurisë, Robert Verkaik, në dhjetor të vitit 2010 dhe 2011. Ato mundësojnë depërtimin në gjendjen e tij mendore në një kohë kur ishte indoktrinuar mjaftueshëm nga ISIS’i dhe rezulton se ishte paranojak, me ankesa të shpeshta se çdo veprim i tij ishte duke u përgjuar nga oficerët e zbulimit.
Emwazi ishte anëtar edhe i një celule të fshehtë të Osama Bin Laden me bazë në Britani, e quajtur “The London Boys” , që planifikonte sulme në Perëndim; po ashtu, ai ishte pjesëtar i një bande të dhunshme rruge, e cila në shënjestër kishte banorët e pasur të Belgravia’s që sulmoheshin me armë tymuese.
Ai u arrestua duke u përpjekur që të detyronte forcat e sigurisë të lejonin një pasagjer që të udhëtonte nga Dar es Salaam në Tanzani për në Johanesburg, pa pasaportë; ngjarje e vitit 2009.
Ndërkohë, i ati i tij mësohet se ishte polic në Kuvajt para se të zhvendosej me familjen e tij në Britani.
