O’Connell merr detyrën e ambasadorit britanik më 14 prill

Ka arritur në Kosovë për të marrë detyrën e tij si ambasador britanik, Ruairi O’Connell. Ai ka arritur në Prishtinë më 10 prill, ndërsa në postin e ambasadorit zëvendëson Ian Cliffin.

O’Connell do të marrë zyrtarisht detyrën si Ambasador në 14 prill, pas një takimi me presidenten Atifete Jahjaga.

O’Connel ishte zëvendësdrejtor në Drejtorinë për bashkëpunim ndërkombëtar për bashkëpunim me NATO-n. Ai më herët është marrë me shumë çështje gjatë karrierës së tij, i fokusuar në çështje të sigurisë evropiane dhe zhvillim ekonomik.

Ai ka shërbyer edhe më herët në Kosovë, në periudhën derisa Kosova e shpalli pavarësinë e saj.

“Jam i nderuar dhe i gëzuar që jam emëruar Ambasador i Britanisë së Madhe në Republikën e Kosovës. Përgjatë historisë së fundit të vështirë, Britania dhe Kosova kanë zhvilluar marrëdhënie të fuqishme dhe jetëgjata. Mezi pres të kthehem në Kosovë dhe të punoj sërish me miqtë e mi, të vjetër dhe të rinj, nga të gjitha komunitetet për të ndërtuar ura të fuqishme dhe ta mbështesim Kosovën në rrugën drejt Integrimeve Evropiane”, ka thënë O’Connel.