Talebanët sulmojnë bazën ushtarake, 140 të vdekur në Afganistan

Ka shkuar të paktën në 140 bilanci i viktimave nga sulmi i një komandoje talebanësh të shoqëruar nga një kamikaz ndaj një baze ushtarake në provincën jug-perëndimore të Balkh.

Lajmi bëhet i ditur nga media të ndryshme në Kabul dhe nga burime ushtarake amerikane. Talebanët kanë arritur të hyjnë në një xhami dhe në brendësi të bazës që priste Trupat Ushtarake Shaheen, duke qëlluar me armë zjarri dhe artileri të rëndë para se të vriteshin më pas.

Gjenerali Dawlat Waziri, zëdhënës i ministrisë së Mbrojtjes, ka bërë të ditur që më shumë se 100 ushtarë kanë vdekur nga sulmi, por shifra e publikuar në një komunikatë nga zëdhënësi i Emirit Islamik të Afganistanit, Zabihullah Mujahid, është të paktën 140 të vdekur.

Ka pasiguri ndërkohë edhe sa i takon numrit të sulmuesve, të cilët mbanin uniforma ushtarake. Për ministrinë e Mbrojtjes, bëhej fjalë për gjashtë (pesë të vrarë dhe një i arrestuar), ndërsa mediat lokale thanë ata kanë qenë jo më shumë se dhjetë.