Thaçi në Pragë- Nënshkruhet sot marrëveshja për Fondin e Ballkanit Perëndimor

Zëvendëskryeministri dhe ministri i Jashtëm i Republikës së Kosovës, Hashim Thaçi, do të marrë pjesë në Konferencën e ministrave të Punëve të Jashtme të Grupit te Vishegradit (V4) dhe atyre të vendeve të Ballkanit Perëndimor (WB6), që zhvillohet në Pragë.

Sipas një njoftimit të MPJ-së, Thaçi u takua mbrëmjen e djeshme me ministrin e Punëve të Jashtme të Çekisë, Lubomir Zaoralek, e pas takimit dypalësh, të gjithë ministrat e Grupit të Vishegradit, ministrat e vendeve të Ballkanit Perëndimor, RCC-it, janë takuar edhe me zëvendëspresidentin e parë të Komisionit Evropian, F. Timmerman.

Në kuadër të sesionit plenar, sot ministrat e Grupit të Vishegradit dhe ministrat e vendeve të Ballkanit Perëndimor, bashkë me zyrtarët e RCC-it dhe ata të Komisionit Evropian do të diskutojnë për zgjerimin e BE-së, për raportet e progresit, për migrimin, bashkëpunimin rajonal, etj.

Gjithashtu, sot në samitin e Pragës, me një ceremoni solemne do të nënshkruhet edhe marrëveshja për Fondin e Ballkanit Perëndimor dhe në fund do të mbahet edhe një konferencë për media.
Grupi i Vishegradit apo V4 është një forum apo aleancë e bashkëpunimit rajonal në mes të Republikës së Çekisë, Hungarisë, Polonisë dhe Sllovakisë.