Thirrja e Berishës për ndërkombëtarët: ISIS do të ketë minierat e floririt me kanabisin në Shqipëri
Kanabisi, ishte ai që dominoi fjalën e ish-kryeministrit Sali Berisha në Kuvend. Ai deklaroi se krye-arkitekti i gjithë mbjelljes së kanabisit është Edi Rama.
Ai hodhi akuza të forta për qeverinë, ndërsa tha se NATO dhe BE duhet të monitorojnë situatën në vendin tonë pasi ajo po rrëndohet më shumë.
Berisha: Sot siguria kombëtare është më e kërcënuar se kurrë në historinë e këtij vendi nga kohërat e luftrave deri tani. Shqipëria është shndërruar në Kolumbinë e dikurshme, jo të sotme. Kanabisi, arat e deputetëve, politikanëve, deputetëve dhe ministrave kanë mbuluar vendin nga Pogoni në Vermosh. Asgjë nuk kërcënon më shumë sigurinë e këtij vendi sesa kanabisi. Për shkak të kësaj situate… Shko dhe mësoja në Golish lahutën atij. Mos më ndërpre më (i thotë deputetit Paulin Stërkaj). Pse kam denoncuar arat tua është e drejtë e qytetarëve. E dinë qytetarët. Prandaj shkoi policia dhe e preu. Ke të tjera, shko në fshat dhe shikoje si e ke pëllëmbë dhe kanabis. Unë jap alarmin se kjo situatë është më kërcënuesja për sigurinë kombëtare dhe unë u them shqiptarëve, i them NATO-s dhe BE se në Shqipëri ISIS do të ketë minierat e floririt me kanabisin e kriminelëve shqiptarë, e bandave shqiptare. U bëj thirrje komunitetit ndërkombëtar ta marrë në mënyrën më serioze.
