Ahmetaj: Së shpejti reforma në “Doing Business” për të lehtësuar kushtet e të bërit biznes në Shqipëri

Ministri i Zhvillimit Ekonomik, Tregtisë dhe Sipërmarrjes, Arben Ahmetaj, ka kërkuar ngritjen e një grupi të përbashkët pune mes vendeve të rajonit, që të punojë për të materializuar diskutimet e nisura në Berlin në një platformë bashkëpunimi, me projekte konkrete dhe reforma të përbashkëta gjatë punimeve në Konferencën Ekonomike në Malin e Zi.
Në Konferencë morën pjesë përfaqësues të kompanive dhe ministrat e Ekonomisë të vendeve në rajon, të cilët diskutuan mbi mundësitë, fushat potenciale të investimeve dhe sfidat për bashkëpunim rajonal.
Ahmetaj propozoi që brenda dy muajve të punohet për ngritjen e grupit, i cili të dalë me një dokument të përbashkët dhe konkret. Këtë dokument kryeministrat e vendeve të rajonit pritet që t’a prezantojnë në Berlin në një takim të përbashkët.
Propozimet e ministrit Ahmetaj synojnë rritjen e bashkëpunimit rajonal në kushtet kur bizneset në rajon nuk janë shumë të ndërlidhur mes tyre. “Kuadri i diskutimeve të Berlinit,duhet të kthehet në një guidë, mbi të cilën të bazojmë vendimmarrjen dhe nismat tona, sigurisht edhe “follow up”, tha ministri Arben Ahmetaj.
Duke u ndalur tek ekonomia shqiptare, ministri foli për rritjen e saj, ndërsa theksoi se programet me FMN dhe Bankën Botërore po funksionojnë shumë mirë. “Shumë shpejt ne do të lançojmë reformën në “Doing Business”, e cila synon përmirësimin e 7 nga 11 indikatorëve të raportit, por mbi të gjitha do jetë shumë i prekshëm për bizneset në kuadër të lehtësimit të kushteve të të bërit biznes ne vend”, tha ministri Ahmetaj.
Gjithashtu, ai përmendi rishikimin e ligjit të investimeve strategjike dhe të konçesioneve, për t’i bërë më shumë efiçente për ekonominë. “Ne duhet të rrisim shpejtësinë e reformave tona”, tha ministri, duke iu përgjigjur ritmit të interesit të investitorëve të huaj.
“Shqipëria po bën një punë shumë të mirë për përmirësimin e klimës së biznesit, por nevojiten investime”, shprehu mendimin e tij Ahmetaj. Me idenë se, pa investime, nuk mund të ketë sukses, ministri tha se, “ne duhet të heqim proçedurat burokratike, që janë pengesë për investimet e huaja direkte. Ne jemi duke bërë një punë të mirë në këtë drejtim, por sërish ekonomitë tona po performojnë nën potencialin e tyre real, që do të thotë se ka ende oportunitete dhe hapësira të pashfrytëzuara, të cilat duhet t’i kapim”.
Në tryezën e rrumbullakët të ministrave të Ekonomisë dhe përfaqësuesve te bizneseve, moderatori Eckhard Cordes, kryetar i Komitetit për Marrëdheniet Ekonomike të Evropës Lindore, u shpreh se ky takim është në kuadër të Konferencës së Berlinit dhe qëllimi është të thellohen lidhjet dhe diskutimet e iniciuara më 28 gusht, si dhe të adresohen pengesat që mund të ekzistojnë për momentin.