Rama: Digjitalizimi i Kadastrës përfundon brenda vitit 2027

Kryeministri Edi Rama, njëherësh kryetar i Partisë Socialiste deklaroi sot se deri tani në gjithë vendin janë kryer rreth 300 mijë legalizime ndërsa mbeten ende edhe rreth 70 mijë të tjera për t’u bërë.

Në një bashkëbisedim me qytetarët gjatë mbledhjes së Asamblesë së PS-së në njësinë 14 në kryeqytet, Rama u ndal te sfidat që dalin para në procesin e legalizimeve.

“Legalizimet janë një proces i vështirë, kjo nuk diskutohet. Janë bërë shumë legalizime, afro 300 mijë, por ka akoma edhe një numër rreth 70 mijë që duhen bërë. Ndërkohë që një pjesë e tyre janë problem sepse janë të pamundura nga ligji aktual. Janë mbi kolektor, mbi rrugë, por gjithsesi një pjesë tjetër duhen bërë se mund të bëhen”, u shpreh Rama.

Kryeministri u ndal te koha e regjistrimit, ndërsa theksoi se do të krijohet një sistem ku nuk mund të bëhen kapërcime çështjesh.

“Ajo që mua më shqetëson është pse dikush që e pret legalizimin që në 2010-ën duhet të presë akoma, ndërkohë që dikush tjetër që e ka bërë kërkesën në 2018-ën duhet ta marri përpara. Nuk mund ta fillosh ta mbarosh bllokun se pastaj i bie që ai tjetri te blloku tjetër që po pret që në 2010-ën do vazhdojë të presë, ndërkohë që këtu te ky blloku, meqë ra radha te ky blloku, ky tjetri 2018-ës do marri përpara. Por ama, kur kjo ndodh brenda të njëjtit bllok, që unë kam 10 vjet që pres dhe komshiu im ka 5 vjet që pret dhe komshiu e merr unë s’e marr, atëherë ka një problem”, tha Rama.

Kryeministri theksoi se do të bëhet një sistem me kritere të qarta dhe sipas viteve të regjistrimit.

Kjo, sipas tij, do krijojë më shumë qartësi për njerëzit.

“Ne do përpiqemi që të krijojmë dhe më shumë kapacitet, duke përdorur edhe njësitë bashkiake, duke përdorur edhe koordinatorët, kryepleqtë për të pasur më shumë ritëm procesi. Gjithsesi puna vazhdon, legalizime bëhen përditë, që të jemi të qartë, nuk është se është diçka që ka ngecur”, shtoi ai.

Rama tha se po ashtu po dixhitalizohen të gjithë hartat, pasi problemi i madh i kadastrës është që e ka informacionin të bazuar nëpër harta.

“Deri tani janë skanuar 54 milionë fletë. Është bërë një punë e madhe dhe tani është fatmirësisht drejt përfundimit. Do kemi më në fund brenda 2027-s, çdo gjë të dixhitalizuar edhe do jetë më e thjeshtë për të pasur pastaj ndërveprim me njerëzit”, shtoi ai.

/a.f/