Albumi i parë i Dua Lipës

Pas asaj që u duk një pritje e përjetshme, albumi i parë i Dua Lipës është hedhur në treg, e ashtu si titullohet një prej hiteve të saj, “Blow Your Mind”, premton t’jua marrë mendjen!

Mediat britanike nuk ja kursejnë lëvdatat këngëtares se talentuar shqiptaro-britanike, albumi i së cilës ka qenë i shumëpritur nga adhuruesit. Edhe pse ishte parashikuar të publikohej më herët, vonesa është mëse e justifikuar.

Siç kishte premtuar 21-vjeçarja, albumi debutues i quajtur thjesht “Dua Lipa” përfshin bashkëpunime tepër të arrira me artistë të tillë si Miguel dhe Chris Martin, ndërsa repertori është gjithçka tjetër përveçse i mërzitshëm.

Duke kujtuar se disa prej hiteve të saj, si “Be the One” apo “Hoter than Hell”, kanë prekur majat e klasifikimeve britanike duke lënë pas në disa raste edhe Drake apo Ed Sheeran, mediat paralajmërojnë se albumi mund të shndërrohet në një prej më të suksesshmeve të sezonit veror.

I regjistruar mes Londrës, Los Angelesit, Torontos dhe Nju Jorkut albumi përmban 12 këngë. Përmes një postimi në rrjetin social “Twitter”, Dua tha se ky ishte një moment shumë i veçantë për të dhe se ndihej krenare për atë që kishte arritur.