“Arrest me Burg” për gjyqtarin Doda, mori ryshfet për një çështje gjyqësore

Gjyqtari i Sarandës, Rasim Doda i arrestuar ditën e premte nga Policia e Tiranës nën akuzën e korrupsionit është paraqitur sot në gjykatë ku u njoh me masën e sigurisë “Arrest me burg” për 1 muaj.

I arrestuar tri ditë më parë, Doda akuzohet se ka marrë ryshfet për të ndryshuar fatet e një seance gjyqësore. Zbulimi i këtij fakti ka bërë që Këshilli i Lartë i Drejtësisë t’i hapi dritën jeshile prokurorisë dhe Policisë për të ekzekutuar urdhër-arrestin e lëshuar prej organit të akuzës. Pak orë pas vendimit të KLD-së, në Tiranë policia e kryeqytetit prangosi Dodën, duke e dërguar në qelitë e paraburgimit.

Sot në orën 11:00 gjyqtari i Sarandës u paraqit në gjykatën e Tiranës ku kërkoi lirimin e tij, teksa prokuroria kërkoi rikonfirmin e arrestit më burg. Gjykata vendosi “Arrest me Burg” për 1 muaj për gjyqtarin, afat ky që duhet t’i mjaftojë organit të akuzës për të çuar çështjen në gjykatë dhe për të kërkuar sërish rritjen e kohës së burgimit.