Ballkani Perëndimor, një destinacion turistik i integruar

Ballkani Perëndimor mund të konkurrojë në tregun global të turizmit, si një destinacion turistik i integruar.

Kjo ishte një prej temave kryesore të diskutuara në në Konferencën Rajonale Ekonomike të Ballkanit Perëndimor, që u mbajt në Budva të Malit të Zi në datat 24-25 shtator.

Në këtë aktivitet ku një vend të veçantë iu kushtua turizmit, Shqipëria u përfaqësua nga Agjencia Kombëtare e Turizmit (AKT), me drejtuesen e saj, Julinda Dhame.

Në një panel të organizuar me homologët e saj të Ballkanit, u diskutua për mundësitë dhe hapësirat e bashkëpunimit rajonal, ku vendet tona mund të konkurojnë në tregun global të turizmit, si një destinacion turistik i integruar

Në diskutimin e saj, Dhame prezantoi përpjekjet nga pala shqiptare për të zhvilluar dhe konsoliduar marrëdhëniet me vendet e tjera të rajonit në sektorin e turizmit. Gjithashtu, ajo shprehu gadishmërinë e plotë në projektet rajonale të zhvillimit të turizmit.

Ndërkohë, në kuadër të këtij bashkëpunimi vlen për t’u përmendur fakti që Shqipëria ka nënshkruar disa marrëveshje dhe Memorandume bashkëpunimi me disa vende të rajonit si Mali i Zi, Kosova dhe Maqedonia, në forcimin e marredhënieve reciproke në fushën e turizmit, duke inkurajuar kështu kooperimin midis subjekteve turistike, si publike dhe ashtu edhe private, në mundësimin e paketave të përbashkëta turistike, bazuar në kulture, traditë, histori dhe bukuritë natyrore.
Gjithashtu, organizimi i takimeve rajonale, workshop-ve, panaireve dhe aktivitete të tjera të përbashkëta kanë bërë të mundur njohjen më tepër mes vendeve tona, duke patur si synim që në të ardhmen rajoni i Ballkanit të ketë mundësinë të ofroje një paketë të unifikuar turistike.