Basha merr goditje të rëndë nga aleatët: S’kemi besim te votimi elektronik!
Aleatët e Lulzim Bashës, Dashamir Shehi dhe Nard Ndoka janë në një linjë me demokratët për garantimin e votës së lirë të qytetarëve, por si parti më vete ata kanë propozimet e tyre përsa i përket sistemit. Dashamir Shehi i Lëvizjes për Zhvillim Kombëtar është skeptik për votimin elektronik.
“Ne duam një sistem i cili ti japi mundësi shqiptarëve të votojnë dhe parti alternative. Unë për vete do të isha për një sistem të kombinuar mazhoritar plus proporcional. Por nuk ka ardhur dita për të deklaruar sot sistemin. Qytetari që ka vendosur të shitet që nga shtëpia e vet në daç elektronik në daç me letër po njësoj do shitet. Ne të fillojmë njëherë ti regjistrojmë, le të shohim vendet ku mund të votojnë emigrantë, që sigurisht janë këta që janë më afër Italia, Greqia”, u shpreh Shehu.
Teksa propozon një sistem ndryshe nga Shehi, Nard Ndoka i Partisë Demokristiane kërkon më tepër hapësirë për partitë e vogla.
“Sipas një gjykimi që partia demokristiane ka mund të ishte një proporcional Kombëtarë preferencial do të ishte zgjedhja më mirë në këto kushte për faktin se PS dhe PD asnjëherë nuk kanë miratuar një reformë për të vendosur standarde për të respektuar frymën e Kushtetutës e votën e qytetarëve, por janë përpjekur që nëpërmjet mekanizmave të Kodit Zgjedhorë të përjashtojnë partitë e tjera politike nga përfaqësimi”, tha Ndoka.
Në takimin me aleatët lideri i demokratëve Basha theksoi se reforma zgjedhore duhet pikësëpari të shmangë manipulimin e votës së lirë të qytetarëve.
