Basha në OSBE, denoncon “shkatërrimin e standardeve zgjedhore”

Kryetari i Partisë Demokratike, Lulzim Basha, i shoqëruar nga kryetari i PR, Fatmir Mediu dhe një delegacion i opozitës u takuan në Vjenë me sekretarin e përgjithshëm të OSBE-së, Lamberto Zannier dhe me përfaqësues të Këshillit të përhershëm të ambasadorëve të këtij misioni.

Në fjalën e tij, Basha ka falënderuar misionin e vëzhguesve që monitoruan procesin zgjedhor të 21 qershorit dhe ka prezantuar faktimin e problemeve të mëdha, të cilat sipas tij kanë minuar besimin e zgjedhësve te vota e lirë.

Basha u ndal konkretisht tek kandidimi nga mazhoranca të personave me rekorde kriminale, si trafikantë, tutorë, pengmarrës dhe kriminelë të njohur e të skeduar në vende të ndryshme të Europës.

Ata, ka theksuar Basha, ushtruan presion të hapur ndaj zgjedhësve dhe aktivistëve të opozitës, si dhe përdorën paratë e krimit të organizuar për të blerë vota.

“Në këto zgjedhje u aktivizuan masivisht dhe dhunshëm banda të armatosura kriminale të lidhura me pushtetin, të cilat kanë vepruar si njësi paramilitare për të kërcënuar dhe dhunuar kandidatët, aktivistët dhe zgjedhësit e opozitës para syve të policisë, të cilët nuk ndërmorën asnjë masë”, ka thënë Basha.

Sekretari i përgjithshëm i OSBE, Lamberto Zannier e ka siguruar zotin Basha për një vlerësim objektiv dhe të saktë të zgjedhjeve, i cili do të reflektohet në raportin përfundimtar.