Besimtarët myslimanë kremtojnë festën e Fitër Bajramit

Pas 30 ditëve agjërim, lutje, adhurime, besimtarët myslimanë shqiptarë, dhe ata në mbarë botën, sot festojnë Fitër Bajramin.

Kjo festë ka nisur me faljen e Bajramit. Në Tiranë, qytetarët e besimit myslimanë, si zakonisht, janë mbledhur në Bulevardin “Dëshmorët e Kombit” për të kryer ritet e tyre.

Me rastin e kësaj feste, kryetari i Komunitetit Mysliman të Shqipërisë, Skënder Bruçaj ka uruar besimtarët dhe të gjithë shqiptarët anembanë botës për festën e Fitër Bajramit, e cila është simboli i paqes, qetësisë shpirtërore dhe harmonisë.

Gjatë lutjes, kryetari Bruçaj ka kërkuar nga Zoti më shumë begati, paqe e qetësi për shoqërinë dhe atdheun tonë.

Ndërsa, në Prishtinë, besimtarët myslimanë janë mbledhur në Xhaminë e Madhe.

Me një urim iu është drejtuar të gjithë besimtarëve myftiu i Kosovës, Naim Tërnava. Ky i fundit ka përgëzuar të gjithë besimtarët për përmbushjen e njërit prej detyrimeve kryesore të fesë islame siç është agjërimi.

Myftiu tha se Kurani mbështet konceptet e moralit e dashurisë mes njerëzve, andaj përmes agjërimit përhapë ndjenjën e përkushtimit, dashurisë e respektit, harmonisë e kënaqësisë.