Bllokimi i rrugëve, Rama viziton të sëmurin që u bllokua nga protesta
Kryeministri Edi Rama ka ndarë me ndjekësit në Facebook, videon me rrëfimin e një gruaje e cila u bllokua nga protesta e Partisë Demokratike ditën e djeshme, ku thotë mes të tjerash: “Fali Zot se s’dinë se ç’bëjnë”.
Gruaja shprehet e irrituar, “Protesto sa të duash, por jo të më zësh rrugën mua. Unë isha në ambulancë me të sëmurin brenda, tensioni i tij fluturoi. Të më vdesë njeriu në rrugë…”
Ndërkohë në postimin e tij Rama thotë se të gjithë ata njerëz të zakonshëm që i’u përgjigjen thirrjes për të bllokuar rrugët, duhet ta shohin këtë video.
Ai shton se videon duhet ta shohin edhe të gjithë ata që nuk i’u përgjigjen thirrjes edhe pse janë anëtarë apo simpatizantë të PD-së.
“Ndërsa gjithë atyre të tjerëve që ishin kundër bllokimit të rrugëve dhe do ta shohin këtë video, u lutem të mos mallkojnë të gënjyerit nga frikacakët e ngujuar në Çadër, po thjesht të mos e harrojnë atë që do të shohin!”, shkruan Rama.
