De Biazi paralajmëronte sukses që në vitin 2012

Xhani De Biazi besonte te suksesi. Dhe këtë gjë është munduar ta injektojë te lojtarët kuqezinj që ditën e parë që ka marrë drejtimin e kombëtares shqiptare.

E tha edhe mbrëmë, pas sigurimit të finaleve të “Euro 2016”, se kishin qeshur disa, kur ai vetë kishte premtuar kualifikimin për në finalet e një kompeticioni madhor europian, duke i sfiduar të gjithë kritikët e tij me përgjegjësinë e “veprës së kryer”.

Më 29 shkurt 2012, italiani, që ka marrë edhe nënshtetësi shqiptare, De Biazi, do të zhvillonte ndeshjen e tij të parë me kombëtaren shqiptare. Këtë rrugëtim, që përfshin dy palë eliminatore, për “Botërorin 2014” dhe për “Euro 2016”, e kishte nisur në Tbilisi, ndaj Gjeorgjisë.

Si për ta pasur “provë” në ditën e sotme, pas triumfit historik të kuqezinjve në Armeni dhe shkuarjes direkt në Europianin e vitit të ardhshëm, trajneri italian kishte shpërndarë një letër motivuese dhe orientuese për të gjithë lojtarët, si për t’u përcjellë filozofinë e punës së tij, besimin në fitore dhe sukses.

”Nuk do të jemi inferiorë ndaj asnjë skuadre, kam besim tek ju”. Kjo ishte thirrja e De Biazit për të tijtë, të cilët i zbuloi, i përzgjodhi, i bëri një grup solid ndeshje pas ndeshjeje.

Udhëtoi shumë dhe zbuloi elementë të devotshëm për fanellën e kombëtares, kryesisht në Zvicër, por nuk ngurroi të bënte pjesë të kuqezinjve edhe një portier të Kalmarit, në Suedi.

Ky ishte Etrit Berisha, që më pas u bë “gardiani” i padiskutueshëm i kombëtares.

Emrat e afruar prej tij janë të shumtë, fillojnë që me ardhjen e tij në krye të Shqipërisë e deri në dy kualifikueset e shtatorit, ku prurja më e re ishte Berat Xhimshiti. Një lojtar që shumë shpejt zuri vendin e titullarit dhe i dha një dorë të mirë kombëtares për t’u kualifikuar në “Euro 2016”.