Duma: Do të ruajmë bregdetin, plan afatgjatë për turizmin

Kandidatja e Partisë Demokratike për bashkinë e Durrësit, Grida Duma, ka bashkëbiseduar me banorët e Shkozetit duke ndarë me ta planin afatgjatë për turizmin për të hapur vende pune.

Duma tha se, do të nisë nga ruajtja e bregdetit duke i thënë stop betonizimit, duke lidhur bujqësinë, vlerat historike dhe bregun e ruajtur në një zgjidhje afatgjatë për Durrësin. Ajo theksoi se, Durrësi do të ketë plazhin publik për qytetarët në zonën e Currilave, do të zhvillohet pjesa veriore duke ruajtur koridorin e gjelbër, ndërsa plani i emergjencës parashikon stabilizimin e situatës me kanalizimet brenda një viti e 8 muaj.

“Do t’i themi stop betonizimit të bregdetit. Do të ruajmë bregdetin dhe do të bëjmë gjithë zhvillimin e pjesës së veriut të bashkisë së re atje ku turizmi do të hapë vende pune dhe për ruajtjen e koridoreve jeshile dhe bregdetit për të pasur një qytet jo vetëm për sot, por për të pasur një qytet me vizion afatgjatë edhe për nesër. Projektet e zhvillimit për një turizëm afatgjatë dhe e lidhur kjo me produktet bujqësore, arkeologjine e historine dhe me bregdetin që do ta mbrojmë, do të na japë zgjidhjen ekonomike. Duhet të zhvillojmë qytetin ekonomikisht që të mund të kemi më shumë lekë në xhepat e gjithsecilit. Do stabilizojmë zonën e plazhit me të gjitha standardet dhe do t’i ruajmë standardet atje, por do bëjmë plazhin publik për të gjithë qytetarët tek zona e Currilat. Plani i emergjencës për kanalizimet, për pastrimin e kanaleve të mëdha, për stabilizimin e rrugëve dhe rrugicave mes pallateve në periferi, në kalkulimet tona është një vit e 8 muaj”, tha Duma.