“Elbasan Arena”, edhe me pistë atletike

E cilësuar foleja e re e shqiponjës kuqezi, stadiumi “Elbasan Arena” po i nënshtrohet sërish një ristrukturimi, pasi shumë shpejt ky impiant do të ketë dhe një pistë atletike.

Lajmi është bërë i ditur nga asistent administratorja e Elbasan Arena, Matilda Koçi, e cila ka sqaruar në një prononcim për mediat se, projekti nisi më 27 janar e duhet të përfundojë brenda datës 29 mars kur ky stadium duhet të jetë gati në ndeshjen me Armeninë.

Ideja është që në këtë stadium veç futbollit, të zhvillohen edhe garat e tjera të atletikës. Ndaj me një fond prej 300 milion lekësh, ka nisur puna për ndërtimin e pistës me tartan. Gjatë kësaj periudhe edhe klubi i futbollit të Elbasanit, do të endet “rrugëve” të Shqipërisë, ashtu si edhe Tirana me Partizanin, që po enden nga stadiumi në stadium për të zhvilluar takimet e tyre pritëse.