Federata e Kosovës heq dorë nga himni

Federata e Basketbollit e Kosovës është detyruar të bëjë një hap prapa dhe të ndalojë himnin e Republikës së Kosovës në palestra dhe pallate sporti para ndeshjeve të kampionatit vendas. Ky vendim erdhi pasi pasi që himni shtetëror po fishkëllehet nga tifozët në ndeshjet e ndryshme. Ndalimi i interpretimit të himnit u konfirmua nga Kryetari i organizmit që qeveris koshin në Kosovë, Arben Fetahu, në një prononcim për mediat vendase.

“Vendosja e interpretimit të himnit në ndeshje ka qenë një masë të cilën e kemi filluar këtë vit, edhe atë me qëllimin më të mirë që ta bëjmë mobilizimin e njerëzve rreth asaj që është simobl i shtetit të Kosovës. Megjithatë, duke patur parasysh gjithë këto reagimet që kemi parë kohët e fundit, ne nuk do të donim që të shkaktojmë në asnjë moment ndonjë turbulencë apo ndonjë pakënaqësi te njerëzit që janë nëpër palestra. Andaj, unë besoj fuqishëm që do të marrim një vendim mbi këtë çështje dhe nuk do të kërkojmë intonimin e himnit deri në fund të stinorit, përveç mbase në momentet kur shpallet kampioni apo fituesi i Kupës apo Superkupës, sepse nuk është ideja që të krijojmë çfarëdo trazire, apo pakënaqësie te njerëzit që janë aty”.

Episodi më i bujshëm erdhi gjatë ndeshjes së Superligës së Kosovës në basketboll për meshkuj, në ndeshjen midis Vllaznimit dhe Trepçës, ku tifozeria vendase ndërpreu himnin shtetëror të Kosovës dhe këndoi atë Kombëtar.