Gjeologjia detare, struktura e re e SHGJSH-së

Një strukturë e re e Gjeologjisë Detare, pjesë e Shërbimit Gjeologjik Shqiptar (SHGJSH), e ngritur për herë të parë, do të merret me gjithë problematikën gjeologjike që ka bregdeti dhe shelfi kontinental që ka Shqipëria.
Struktura është ngritur me propozim të ministrisë së Energjisë dhe Industrisë, bazuar në përvojën e shërbimeve gjeologjike europiane, nisur dhe nga interesi në rritje që po shprehin kompanitë e huaja për kërkim dhe zbulim të naftës në bregdetin shqiptar, thonë për ATSH-ne burime zyrtare të ministrisë.
“Qeveria po krijon mekanizmat e duhur qё zonat e lira t’u ofrohen kompanive shumë të mëdha të interesuara për naftën shqiptare”, është shprehur së fundi ministri i Energjetikës dhe Industrisë, Damian Gjiknuri.
Sipas tij, “ka interes të rritur nga kompani ndërkombëtare, që kërkojnë të marrin pjesë në eksplorimin dhe nxjerrjen e hidrokarbureve shqiptare, ndaj shteti do të garantojnë gara transparente, por dhe do të marrë në konsideratë interesat më të mira për publikun, jo siç ka ndodhur shpesh herë kur interesat e tij janë nëpërkëmbur në favor të kompanive”.
Gjiknuri ka bërë të ditur procesin e auditimit me imtësi të të gjitha kompanive të naftës ku për herë të parë po vlerësohet si si është raporti në të ardhurat në dobi të shtetit dhe vetë firmave.
Burime të MEI-t bëjnë të ditur se procesi i eksplorimit do të shtrihet dhe në zona, ku investitorë të ndryshëm që kanë marrëveshje hidrokarbure, nuk kanë bërë investimet e përcaktuara.
Zbulimet e reja për naftë në zonën e Shpiragut në Berat nga kompanitë “Shell” dhe “Petromanas”, kanё zgjuar interesin e kompanive të mëdha të huaja pёr fushat naftёmbajtёse nё Shqipёri.