Gjermania arreston dy të dyshuar për spiunazh, punonin për një shërbim inteligjence kineze

Autoritetet në Gjermani kanë arrestuar dy persona të dyshuar për spiunazh në favor të Kinës, të akuzuar për mbledhje informacioni mbi teknologji të avancuara me përdorim të mundshëm ushtarak.

Sipas prokurorëve federalë, të dyshuarit, të identifikuar si Xuejun C. dhe Hua S., u arrestuan në Mynih pas një hetimi të përbashkët mes policisë dhe agjencisë gjermane të inteligjencës së brendshme, BfV.

Në një deklaratë zyrtare, Zyra e Prokurorit Federal tha se Gjykata Federale e Drejtësisë urdhëroi mbajtjen e tyre në paraburgim, pasi u konsiderua se ekzistojnë prova të mjaftueshme fillestare për përfshirjen në aktivitet spiunazhi.

Prokurorët pretendojnë se çifti i martuar ka punuar për një shërbim inteligjence kineze, duke mbledhur informacione mbi “aftësitë e teknologjisë së lartë me zbatime të mundshme ushtarake” dhe duke i transmetuar ato tek autoritetet kineze dhe kompani të lidhura me sektorin e mbrojtjes.

Sipas hetimeve, të dyshuarit kishin krijuar kontakte me shkencëtarë dhe profesorë në universitete dhe institute kërkimore gjermane, veçanërisht në fushat e inxhinierisë hapësinore, shkencave kompjuterike dhe inteligjencës artificiale.

Hetuesit thanë se ata u afroheshin studiuesve duke përdorur identitete të rreme, duke u prezantuar si përkthyes ose punonjës të një kompanie automobilistike.