Greqia nuk e ndryshon qëndrimin për pavarësinë e Kosovës

Qeveria e re e Greqisë mbetet në pozitat e deritashme dhe nuk do ta njohë pavarësinë e Kosovës, ka thënë ambasadori grek në Beograd, Konstantin Ikonomidis.

“Siç e dini mirë, Greqia është një nga pesë vendet e Bashkimit Evropian që nuk e kanë njohur pavarësinë e vetëshpallur të Kosovës dhe ne vazhdojmë të qëndrojmë në këtë pozicion”, ka thënë Ikonomidis për të përditshmen serbe “Danas”, në një intervistë me rastin e festës kombëtare greke.

Ambasadori grek ka cekur se me rëndësi të madhe për Beogradin në përpjekjet për integrim në BE, është “vazhdimi i angazhimit konstruktiv të qeverisë serbe në procesin aktual të dialogut për normalizimin e marrëdhënieve me Prishtinën”, transmeton KP.