Letërsia përballë kohës moderne – Bashkëbisedim me shkrimtarin Virion Graçi në Fakultetin e Gjuhëve të Huaja

Më 17 mars 2026, në ambientet e Sallës “Rozafa” në Fakultetin e Gjuhëve të Huaja të Universitetit të Tiranës, u zhvillua një aktivitet i veçantë letrar që solli në qendër të vëmendjes dialogun mes autorit dhe lexuesit. Në këtë takim morën pjesë studentë, pedagogë dhe përfaqësues të stafit akademik, ndër ta edhe Dekania e Fakultetit, znj. Esmeralda Kromidha.

I ftuari i nderit ishte shkrimtari i njohur Virion Graçi, i cili u përfshi në një bashkëbisedim të hapur dhe të gjallë mbi krijimtarinë e tij letrare. Diskutimi u përqendrua veçanërisht në romanin e tij më të fundit, “Shtatë dritaret” (2024), një vepër që ka tërhequr vëmendjen e kritikës dhe lexuesit për thellësinë tematike dhe stilin e veçantë narrativ. Me këtë rast, zv. dekania e Fakultetit, znj. Kristina Sheperi, prezantoi një recensë të plotë letrare, duke analizuar dimensionet artistike dhe mesazhet që përcjell romani.

Bashkëbisedimi me z. Graçi nuk u kufizua vetëm në analizën e veprës, por u zgjerua natyrshëm drejt çështjeve më të gjera të letërsisë shqipe. U diskutua mbi sfidat dhe rolin e saj në një epokë të dominuar nga televizioni dhe rrjetet sociale, si dhe mbi rëndësinë e leximit dhe të shkrimit si forma të pazëvendësueshme të shprehjes kulturore dhe individuale.

Atmosfera e aktivitetit ishte e ngrohtë dhe interaktive, duke krijuar një hapësirë ku mendimi kritik dhe pasioni për letërsinë u ndërthurën në mënyrë të natyrshme. Takimi u vlerësua nga pjesëmarrësit si një përvojë frymëzuese, që solli jo vetëm kënaqësi estetike, por edhe reflektim mbi vendin e letërsisë në jetën bashkëkohore.