“Grupi i zjarrit”, Arbjon Alikon lihet në burg

Gjykata e Krimeve të Rënda ka dhënë këtë të martë masën e sigurisë, “arrest me burg” për Arbjon Alikon, për akuzat e ngritura një vit më parë për sulm ndaj policisë në Lazarat.

Arbjon Aliko, së bashku me vëllain e tij Alban, janë dy prej të akuzuarve kryesorë për vrasjen e efektivit të RENEA-s, Ibrahim Basha.

Ndërkohë, masa për vëllain e tij, Alban Aliko pritet të jepet po sot në Gjykatën e Krimeve të Rënda.

Vëllezërit Aliko akuzohen edhe për armëmbajtje pa leje, prodhim dhe shitje narkotikësh, si dhe kundërshtim të punonjësit të policisë.

Ata u arrestuan të shtunën në mbrëmje, të fshehur në një tunel në fshatin Kardhiq 15 kilometra nga Lazarati.

Një ditë më parë, u dha masa e sigurisë “arrest me burg” edhe për 3 persona të tjerë: Klodian Selimi, Dervish Gaba dhe Elvis Boçi, të cilët akuzohen se kanë marrë pjesë në pritën kundër policisë në Lazarat, ku mbeti i vrarë efektivi i RENEA-s. Ata, bashkë me dy vëllezërit Aliko konsiderohen si pjesë e “grupit të zjarrit” që qëlloi me armë ndaj forcave të policisë.